[الفـ البعيد ـجر]

السلام عليكم ورحمة الله وبركاته ...


كيف حالكم صبايا


اليوم .. حبيت أنزل موضوع .. أفيدكم وتفيدوني فيه ..

كلنا ما يخفى عليه أهميه المكياج بالنسبة للمرأه ..

وأهم شي لنا .. كبنوتات .. أننا نحافظ على نعومة وتناغم المكياج .. هذا شي خالصين منه ..

-----------------------------

بعض البنات ... اذا شافت مكياج صديقتها حلو وعجبها .. ما تملك نفسها .. وتقول .. وش هذا ؟؟ ممكن أجربه ؟؟

بهالشكل .. ممكن تستفيد .. وتعرف هل هذا المكياج مناسب على وجهها ولون بشرتها والا لا .. قبل تتوهق وتشتريه ..

أما أنا للأسف .. مو من هذا النوع أبد ... يممممممممكن اسألها من أي ماركه .. لكن لايمممممممممكن أجرب مكياج صديقتي على وجهي .. لازم أروح وأشتريه وأعرف هو يناسبني أو لا .. >>مدري هو زيادة حيا .. والا خباله .. والا مدري كيف تصرفونها ..


وغير كذا ..حنا مانقدر نجرب المكياج في المحلات .. غالبا .. الا على اليد .. ومكياج الوجه غير عن اليد ومرات تزبط معك ومرات كثيرهـ لا

---------------------------------

كتبت هالموضوع .. قلت اطرح لكم تجاربي الشخصية .. وأبي منكم تجاربكم ..

---------------------------------


أولا بالنسبة للأساس .. >> حكايته حكاية

أول علبة أساس اشتريتها بحياتي كانت الأفضل .. ولو ما عطيتوني راي شكلي برجع لها ..

من كلينكـ .. طبعا تلاحظون اني مشطبتها على الاخر ... العلبه الداخلية ممكن تستبدلينها .. وأنا استبدلتها 3 مرات

بالنسبه لي .. ميزته أنه خفيف .. ويعطي تغطيه ممتازه .. يعني يصلح للاستخدام اليومي والدوام الصباحي والأحلى انه معه حمايه خفيفه من الشمس SPF15



اشتريت قبل سنه ونصف .. أساس تشانيل ومن يومها بدأت رحله البحث عن الكنز



كل من شافني قل يوووووهـ الاساس مسمرك بالمرهـ .. وانا راكبه راسي .. شريته بـ 170 ريال .. بحلل قروشه .. يوم ملّيت .. والناس تمادوا بالتحطيم .. قلت اتصدق به على اختي .. وشريت جديد من لانكوم
لكن ما أنكر أنه شانيل فرده على الوجه سهل .. وبسرعه تتشربه البشرة


هذا قال لي اللي يبيع .. أنه اسمه اساس موس لان قوامه مثل قوام الموس (نقصد الحلى مو شفرة الحلاقه ) بالضبط .. وهو عباره عن 3×1
اساس - كونسيلر - موسترايزنج(مرطب)
وهذي المره سويت فيها ذكية وقلت .. عطني اففففففففتح درجه ..
لكن للاسف .. ما أختلف عن اللي قبله كثير وكل من شافني قال ليه!؟ مسويه برونزاااااااج؟؟

وهو بعد سريع الفرد على الوجه .. واحس انه يصلح للبشره الجافه .. لانه دهني شوي ..

وراحت 170 ريال ثانيه .. والله يخلف ..

والحين .. صرت استخدم اساس لانكوم برضو لكن هذي المره سايل .. وهو احسن شي توصلت له .. بعد كلينكـ .. لكن انه بيخلص ..



أخلطه مع كريم الاضاءه .. من ريفالون


ويطلع لي اساس حفلات

عطوني رايكم .. قبل اتوهق وأجرب أساس من محلات أبو ريالين

----------------------------------

البودره السائبة .. أو الحرة .. استخدم cliniuqe برضو .. بس هذي عمرها طوييييييييل ماشا الله .. صار لها تقريبا 3 سنوات وما خلصت



تعطي لمعه خفيفه .. ومحببه غير ملفته للانتباه .. تناسب حتى في الدوام الصباحي ..
-----------------------------
والبودره المضغوطه .. من شانيل .. مش بطاله .. بس أدور احسن منها .. كني شهبا اذا حطيتها


البلاشر Blusher أو حمرة الخدود ..

للسهرات من لانكوم


وللاستخدام اليومي برجوا .. >> انخفضت الميزانيه


هذا البلاشر .. نصيحه مني ... روعه .. ولون خفيف .. ولمعه خفيفه تكاد تكون معدومه .. وسعرها رخيص .. حوالي 35 ~40 ريال والله اني نسيت

جربي اللون rose بدرجة 95 وان شاء الله بتدعين لي

---------------------------

تعرفون الحركه اللي يحطونها المذيعات .. اللمعه اللي على الأنف (للمتحدثين بغير اللغه العربية يعني الخشم) وعلى أعلى الوجنتين .. حركه حلوووووه ..

واستخدم شي ناعم وحلو ..ورخيص من بودي شوب ..



العلبة على اليمين .. بودره سائبه مع كريم اللمعه ..هذا الكريم اللي فوق رووووعه والعلبة كلها بـ 90 ريال .. >>كأني أصلح مندوبة مبيعات

والعلبة على اليسار بودرة جليتر أحب هذا النوع للسهرات يسوي أكشن لطيف على الوجه



-------------------------------------
يلا صبايا بالإذن .. كأني تأخرت .. طالعه وراجعة لكم مع باقي الصور والتجارب

بس الله الله .. لا تحرمونا من تجاربكم ..