..:+(مكياجي ْ ْ ْومكياجكـ )+:.. - منتديات سوني اريكسون

**الفـ البعيد ـجر** · #1 (**permalink**) 06-01-2008, 07:24 AM

السلام عليكم ورحمة الله وبركاته ...

كيف حالكم صبايا

اليوم .. حبيت أنزل موضوع .. أفيدكم وتفيدوني فيه ..

كلنا ما يخفى عليه أهميه المكياج بالنسبة للمرأه ..

وأهم شي لنا .. كبنوتات .. أننا نحافظ على نعومة وتناغم المكياج .. هذا شي خالصين منه ..

-----------------------------

بعض البنات ... اذا شافت مكياج صديقتها حلو وعجبها .. ما تملك نفسها .. وتقول .. وش هذا ؟؟ ممكن أجربه ؟؟

بهالشكل .. ممكن تستفيد .. وتعرف هل هذا المكياج مناسب على وجهها ولون بشرتها والا لا .. قبل تتوهق وتشتريه ..

أما أنا للأسف .. مو من هذا النوع أبد ... يممممممممكن اسألها من أي ماركه .. لكن لايمممممممممكن أجرب مكياج صديقتي على وجهي .. لازم أروح وأشتريه وأعرف هو يناسبني أو لا .. >>مدري هو زيادة حيا .. والا خباله .. والا مدري كيف تصرفونها ..

وغير كذا ..حنا مانقدر نجرب المكياج في المحلات .. غالبا .. الا على اليد .. ومكياج الوجه غير عن اليد

ومرات تزبط معك ومرات كثيرهـ لا

---------------------------------

كتبت هالموضوع .. قلت اطرح لكم تجاربي الشخصية .. وأبي منكم تجاربكم ..

---------------------------------

أولا بالنسبة للأساس .. >> حكايته حكاية

أول علبة أساس اشتريتها بحياتي كانت الأفضل .. ولو ما عطيتوني راي شكلي برجع لها ..

من كلينكـ .. طبعا تلاحظون اني مشطبتها على الاخر ... العلبه الداخلية ممكن تستبدلينها .. وأنا استبدلتها 3 مرات

بالنسبه لي .. ميزته أنه خفيف .. ويعطي تغطيه ممتازه .. يعني يصلح للاستخدام اليومي والدوام الصباحي والأحلى انه معه حمايه خفيفه من الشمس SPF15

اشتريت قبل سنه ونصف .. أساس تشانيل ومن يومها بدأت رحله البحث عن الكنز

كل من شافني قل يوووووهـ الاساس مسمرك بالمرهـ ..

وانا راكبه راسي .. شريته بـ 170 ريال .. بحلل قروشه .. يوم ملّيت .. والناس تمادوا بالتحطيم .. قلت اتصدق به على اختي .. وشريت جديد من لانكوم
لكن ما أنكر أنه شانيل فرده على الوجه سهل .. وبسرعه تتشربه البشرة

هذا قال لي اللي يبيع .. أنه اسمه اساس موس

لان قوامه مثل قوام الموس (نقصد الحلى مو شفرة الحلاقه

) بالضبط .. وهو عباره عن 3×1
اساس - كونسيلر - موسترايزنج(مرطب)
وهذي المره سويت فيها ذكية وقلت .. عطني اففففففففتح درجه ..
لكن للاسف .. ما أختلف عن اللي قبله كثير وكل من شافني قال ليه!؟ مسويه برونزاااااااج؟؟

وهو بعد سريع الفرد على الوجه .. واحس انه يصلح للبشره الجافه .. لانه دهني شوي ..

وراحت 170 ريال ثانيه .. والله يخلف ..

والحين .. صرت استخدم اساس لانكوم برضو لكن هذي المره سايل .. وهو احسن شي توصلت له .. بعد كلينكـ .. لكن انه بيخلص ..

أخلطه مع كريم الاضاءه .. من ريفالون

ويطلع لي اساس حفلات

عطوني رايكم .. قبل اتوهق وأجرب أساس من محلات أبو ريالين

----------------------------------

البودره السائبة .. أو الحرة .. استخدم cliniuqe برضو .. بس هذي عمرها طوييييييييل ماشا الله .. صار لها تقريبا 3 سنوات وما خلصت

تعطي لمعه خفيفه .. ومحببه غير ملفته للانتباه .. تناسب حتى في الدوام الصباحي ..
-----------------------------
والبودره المضغوطه .. من شانيل .. مش بطاله .. بس أدور احسن منها .. كني شهبا اذا حطيتها

البلاشر Blusher أو حمرة الخدود ..

للسهرات من لانكوم

وللاستخدام اليومي برجوا .. >> انخفضت الميزانيه

هذا البلاشر .. نصيحه مني ... روعه .. ولون خفيف .. ولمعه خفيفه تكاد تكون معدومه .. وسعرها رخيص .. حوالي 35 ~40 ريال والله اني نسيت

جربي اللون rose بدرجة 95 وان شاء الله بتدعين لي

---------------------------

تعرفون الحركه اللي يحطونها المذيعات .. اللمعه اللي على الأنف (للمتحدثين بغير اللغه العربية يعني الخشم

) وعلى أعلى الوجنتين .. حركه حلوووووه ..

واستخدم شي ناعم وحلو ..ورخيص من بودي شوب ..

العلبة على اليمين .. بودره سائبه مع كريم اللمعه ..هذا الكريم اللي فوق رووووعه والعلبة كلها بـ 90 ريال .. >>كأني أصلح مندوبة مبيعات

والعلبة على اليسار بودرة جليتر أحب هذا النوع للسهرات يسوي أكشن لطيف على الوجه

-------------------------------------
يلا صبايا بالإذن .. كأني تأخرت .. طالعه وراجعة لكم مع باقي الصور والتجارب

بس الله الله .. لا تحرمونا من تجاربكم ..

**الفـ البعيد ـجر** · #2 (**permalink**) 06-01-2008, 06:29 PM

وعدنا .... مع الجزء الثاني

ظلال ومكياج العيون :

العلبه هذي من SENSI أصغر مقاس (3 ألوان) بـ 80 ريال تختارين الألوان وهو يعبيها لك ..

أول مرهـ أشتري ظلال SENSI جديد مابعد جربته

.. بخبركم بالنتيجه بعدين

>> عادة اشتري الظل من مكياجي ..أو mac

ظلال مكياجي احس انه موب مضبوط ومع طول الوقت يتكتل على الجفن ..

أما ماك ماعليه ممتاز ..

وأحتاج ارائكم بخصوص الشدو .. لأن مالي تجارب كثيرهـ معه

------------------------------------------

أقلام الكحل مجموعه متوسطة السعر اشتريتهم كلهم من دبنهامز

الأول من فوق : كحل بني ماركة jolie de vogue واللون dark coffee no2 >> ممتاز ولونه حلو

القلم الثاني: كحل اسود ماركة ايطالية jolie de vogue واللون طبعا black سواده موب مرررره كويس بس يمشي الحال .. أبي منكم قلم كحل أحسن

القلم الثالث : محدد حواجب بلون بني ماركة jolie de vogue اللون tobacco no1>> اللي تشتريه بكسر أصابعها خخخخ خاصه هاللون موب طبيعي بالمرهـ

القلم الرابع: كحل ابيض للعيون وتحت الحاجب ماركة maxFactor 010 white >> هذا ممتاز واستخدامه سهل

نجي الحين للمجموعة المفضلة

المجموعة من لانكوم

كحل سايل : ARTLINER >> ريشته ممتازه تقلل من التعرجات تصلح للي معها فقر دم ويدها ترتجف

ماسكرا :FATALE >> ريشتها عبارة عن مشط.. وهي صعبه الاستخدام .. بس تعطي نتيجه طبيعية..
فيه انواع ثانيه طبعا من ماسكرا لانكوم .. وكل وحده لها شغله مختلفه .. اذا نويتي تشترين من لانكوم .. اسألي عن ماسكرا تكثيف وتطويل الرموش ..

الكحل الازرق : حلاااااااااااال عليه القروش

ابن حلال .. لونه حلووو .. واستخدامه حلووو .. ونتيجته حلوهـ ..
خصوصا لو استخدمتيه على خط الرموش السفلي وحطيتي ظل خفيف على الجفن العلوي
كحل قلم من لانكوم بلون أسود .. حاليا هو الأفضل عندي

وأحلى عدسات اشتريتهم .. عدسات ديور ..

كنت اخاف أشتريها .. لانها لمده شهرين .. وسعرها حوالي 350 ريال .. وما تقدرين تجربينها بالمحل .. يعني ان صلحت والا الله يخلف

لكن يوم كتب الله وشريتها .. قلت حلال عليها الفلوس .. تعطيك نظرة طبيعية .. وتوسع العين .. إذا لبستيها اللي يشوفك ما ينتبه انك لابستهم .. لكن لو لبستي عدسه وعدسه لا .. بتلاحظين كيف الفرررررررق !
------------------------------------------

الأرواج وحمرة الشفاه :

القاعده تقول .. ظل ثقيل وروج خفيف .. أو العكس ..

أحلى روج اشتريته من ايف سان لوران فااااااااااشن ..بلونين فوشي فاقع وبرتقالي

ثباته ولونه .. وربي جنان ..

لكنه مطفي .. ويحتاج gloss لو كنتي تحبين الروج اللامع ..

>> لاتحسبوني فسقانه وشاريه 3 أرواج من نفس النوع بس عشان أوريكم

وعندي بعد مجموعه أرواج ..

الاحمر من لانكوم .. يميل للون الطبيعي .. إذا كنتي تفضلين اللون الاحمر جربي أحمر الشفاه من ايف سان لوران أحمر نااااااااااااااقع وحلو بس هذا يجي لحاله .. موب زي اللي فوق ..

والبيج من جيفنشي .. ينفع للدوام الصباحي .. كنت استعمله يوميا مع gloss من أيام الكليه

**الفـ البعيد ـجر** · #3 (**permalink**) 06-01-2008, 06:57 PM

مجموعة تنظيف البشرة :

مجموعةبوصفة طبيه من مستوصف أيما ..

الصراحه أنها رهيييييييبه وتعطي نتايج تبين من أول اسبوع استخدام .. !

كنت قبلها استخدم مجموعة deep clean من نيتروجينا .. المجموعة هذي تناسب بشره عن بشرة .. أنا كانت تناسبني بالمرررررررهـ بينما اختي يصير وجهها كنه قرص خبز محمر على الصاج

وسعرها جدا معقووووول .. أو يمكن يكون رخيص ما يتعدى 100 ريال للمجموعه اللي في الصورة
7
7

---------------------------------

واقي الشمس

بعد أخذته من مستوصف أيما .. وموجود في الصيدليات ..

---------------------------------
تجعيد الشعر:

إذا مالك خلق .. والنفس شينه .. مالك الا حمام بارد منعش .. >> هذا بالصيف مو تتوهقون تسونها في الشتا

وشعرك لا تشيلي همه

مجموعة ويلا .. لتجعيد الشعر .. رهييييييييبه .. البخاخ يجعد الشعر بشكل منتظم .. والجل يحافظ على الشكل ..

أحلى مافي الموضوع .. ان النتيجه تكون طبيعية .. وشعرك يكون متموج ولين موب واقف كنه أسلاك حديد

على فكرهـ: التجعيد = موضه الصيف .. تخيلي شكلك بيصير غلط لو جعدتي شعرك ولبستي جاكيت صوف

---------------------------------------------

عطور :

اخر شي جايبه لكم اخر تجاربي في العطور ..

نبدأ من اليمين :

1) أحب شعري ريحته حلوه ..وهذا عطر مخصص للشعر chanel Nْ 5
2) عطر لا باس la base من باريس جاليري .. هذا يصلح للي تحب دهن العود والبخور .. بس بنكهه حديثه .. طبعا هو من مخلطات باريس جاليري حصري عليهم .. >> ريحته قويه يصلح للمساء
3) عطري المفضل Cinema من ايف سان لوران .. وهذا العطر كان ون شوت .. ينزل مره وحده بالموسم ..
لانه مخفف المخفف

لكن البرفيوم والتواليت موجود على مدار السنه
4) عطر elle من ايف سان لوران برضو .. وريحته تشبه Cinema كثير .. بس يوم نزلت اعلاناته .. شريته قبل يخلص عطري Cinema >>بهالشكل لازم ايف سان لوران يعطوني درع الزبونه المخلصه

ونصيحه .. عطر دايموند من ارماني .. نازله دعاياته بكثافه .. يوم شميته طلع فعلا جنان .. اللي ناويه تشتري عطر تشقر عليه

-----------------------------------------

يلااااااااا عاد ... على قد ما تعبت ... أبي منكم تفاعل .. وتجارب ..مو بالضرورة .. تصورين لنا مكياجك .. ممكن تلاقين الصور على الشبكه .. والا اكتبي لنا اسم المنتج وحنا نجيب الصوره من قرونها

اللي تكتب تجربتها مع المكياج .. بعطيها حلاو مصاص غندوووور واللي ماتكتب .. أحسن .. موب معطيتها شي

لولوتا السماثا · #4 (**permalink**) 07-01-2008, 12:44 AM

أهلين الفجر ،،
موضوعك فانتستك = )
وانبسطت خصوصاً اني تعرفت على اشياء جديدة << ابشري بعزك هع

اقتباس:

اول مرهـ أشتري ظلال SENSI جديد مابعد جربته .. بخبركم بالنتيجه بعدين

أنا جرّبته لك .. شوفي هو زين والوردي لونه خ ط ي ر يعني موفقه بالحييل فيه
بس لا رجعت من الدوام يكون متكتل الشدو على الجفن ،، يمكن عشاني احطه 7 ساعات ونص

بعدين تعالي تعالي/ لعنبو عدوتس وش قصتس ؟
عندتس كل هالعطور واسألك عندك عطر ؟ تقولين لا =( ؟

بعدين فيه عطر ما حطيتيه ،، اللي على مكتبتس ! وراتس جاحدته ؟

اقتباس:

قلت اتصدق به على اختي ..

قسسسمن بالله العلي العظيم موب انا :/

\

راجعتن لتس بعد ما اخلص اللي خبري خبرتس << تجحد يقالنه

شرْق · #5 (**permalink**) 07-01-2008, 03:46 AM

و عليكم السلام و الرحمة ...
مرحباً الفجر البعيد ..
موضوع يحمس لسوق ..
جهد جميل ..
أنا وحدة أسأل ويش عند الي يبيعون و أشتري الي يعجبني و يا صابت يا خابت

..

في المكياج لا أحمل همه كثيراً .. أحبه لكن ليس حد الإسراف .. و لا أضع إلا في المناسبات أو إذا صار لي مزاج .. فأي شيء يعطيني نتيجة مرضية أقبل به

..

لكن في العطور حكاية صعبة .. أصعب شيء أشتريه و أحتار فيه ..

يعني يمكن يعجبني عطر و لمن أشتريه و أستخدمه بعد فترة ما يعجبني أو أحس ريحته غير الي عجبتني ..

..

عطور عجبتني : 212 رغم أني ما شريته ..
جادور ..
ميركل ..

..

و كل الشكر و التحية الفجر على الموضوع ..

**الفـ البعيد ـجر** · #6 (**permalink**) 07-01-2008, 06:41 AM

اقتباس:

المشاركة الأصلية كتبت بواسطة لولوتا السماثا

أنا جرّبته لك ..

عند حسن ظني بك

اقتباس:

بعدين تعالي تعالي/ لعنبو عدوتس وش قصتس ؟
عندتس كل هالعطور واسألك عندك عطر ؟ تقولين لا =( ؟

>> هو انا كنت خلفتك ونسيتك !

اقتباس:

بعدين فيه عطر ما حطيتيه ،، اللي على مكتبتس ! وراتس جاحدته ؟

خلاص خوذيه لتس

اقتباس:

المشاركة الأصلية كتبت بواسطة شرْق

مرحباً الفجر البعيد ..
موضوع يحمس لسوق ..
جهد جميل ..

انا قايله المفروض اخذ نسبه على محلات المكياج

اقتباس:

لكن في العطور حكاية صعبة .. أصعب شيء أشتريه و أحتار فيه ..

بهذي معك حق

ماحب شراء العطووووووور .. تملين وتطفشين وتختلط عليك الروائح ويصدع راسك وانتي تشمين عند المحلات ...

عشان كذا صرت أخلي اللي يبيع يرش لي كم بخه من كم عطر .. وأحطهم كل واحد بكيس

وكل شوي اطلع واحد وأشم ريحته ..

اقتباس:

و كل الشكر و التحية الفجر على الموضوع ..

العفووووو وأشكر لك تواجدك

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحـــث المتقـــدم
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري